Alta tecnoloxía escolar

Estes son os chamados "niños del cable", estudiantes colombianos que cada mañá teñen que utilizar este transporte escolar gratuíto para ir a escola. Que vos parece?.

Ola a todo o mundo. Os departamentos de Tecnoloxía e Matemáticas organizan o...

II CONCURSO DE FOTOGRAFÍA TECNO-MATEMÁTICA
IES MONTE CARRASCO

PARTICIPANTES
Podemos participar TODOS. Todos quere dicir alumnos, profesores, PAS, nais e pais, ex-alumnos (e se non estás entre os anteriores, pregunta). Agora ben, só resultarán premiadas as obras dos alumnos matriculados no centro este ano.

TEMA
O tema das fotografías ten que estar relacionado co mundo da tecnoloxía e das matemáticas. Hai un montón de exemplos sen máis que visitar o blog do insti aghaivota.blogspot.com ou poñer “fotografía matemática” en google.

PRESENTACIÓN
As fotografías entregaranse a calquera membro do departamento de Matemáticas (Uxío e Álex) ou Tecnoloxía (José Antonio e Elena). As fotografías deberán ir montadas nunha cartolina tamaño DIN A4 (tamaño folio) coa seguinte distribución: na parte superior debe ir o título, na parte central a fotografía e, na parte inferior, un breve texto do autor (explicación, interpretación, idea, ...). Na parte posterior da fotografía deberá figurar o nome do autor e a súa relación coa comunidade educativa do IES Monte Carrasco. Ademais deberase entregar a fotografía (con título e texto) en formato dixital (vía memoria USB, CD, correo electrónico a alancoia@edu.xunta.es).
Poderanse presentar un máximo de dous traballos por participante.

PRAZO
O prazo de presentación finaliza o mércores 27 de maio.

XURADO
Estará formado polo profesorado dos Departamentos de Tecnoloxía e Matemáticas e un profesor doutro departamento e valorará a orixinalidade e idoneidade do título, a calidade plástica e técnica da imaxe, o seu contido matemático e a explicación dada.

PREMIOS
Haberá tres premios: 1º premio (50 €), 2º premio (20 €), premio especial do público (10 €). Os premios non serán entregados en metálico senón por: material fotográfico, electrónico, libros, música ou películas. O xurado poderá declarar deserto calquera dos premios.

AUTORÍA DAS IMAXES
As fotografías deben ser orixinais e en ningún caso se aceptarán fotos descargadas de Internet, nin escaneadas de ningún tipo de medio gráfico. Comprobarase minuciosamente a autoría das fotos (especialmente das premiadas), esixindo aos gañadores que demostren a súa autoría. Si se permiten fotomontaxes e retoques a partir de orixinais.

Déixovos aquí os enlaces do ano pasado para que lle botedes unha ollada:
http://aghaivota.blogspot.com/2008/05/i-concurso-de-fotografa-matemtica.html
http://aghaivota.blogspot.com/2008/06/fotografa-matemtica.html

Olha que blog Maneiro!

Os nosos amigos de Pequesreboreda (pequesreboreda.wordpress.com) e NUESTRO ENTORNO NOS IDENTIFICA (nuestroentornonosidentifica.blogspot.com) acaban de agasallarnos co premio “OLHA QUE BLOG MANEIRO!, que significa algo así como Mira que blog tan orixinal e creativo. Así que queremos darlle as grazas aos nosos compañeiros por pensar en nós para este premio. Fainos moita ilusión!!!

O premio ten unha serie de normas que hai que seguir:

1. Exhibir a imaxe do premio “Olha que blog Maneiro!”

2. Poñer o nome do blog que cho deu

3. Indicar os teus 10 blog

4. Avisar aos implicados

5. Publicar as regras.

6. Comprobar que os blogs indicados sigan as regras.

En breve, publicaremos os nosos blogs.

San Isidro (versión profe)

A semana pasada, Xaquín e máis eu atrevémonos a acompañar á xentuza (ou xentiña)de 2º á neve.

Alá estabamos o domingo na estación de autobuse cando chegou Secundino (o noso conductor) co autobús cheo de pontevedreses de 1º da ESO, Xan e Xosé Luis (os profes acompañantes) e Carla e Yoli (as nosas monitoras).

Seis horas de bus, con parada na Gudiña a repoñer forzas e en Boñar a recoller a Conde (o noso outro monitor, alias "o Moñañés"), para chegar a Cofiñal, pequeno e nevado pobo a carón de Puebla de Lillo. Alí coñecemos ao resto dos monitores: Zaira (de Cangas tamén) e Abel (un pouco tolo el, e o que máis trasnadas fixo en toda a semana), Despois do reparto de habitacións, a cear.

O luns pola mañá recollemos o material que iamos utilizar toda a semana (botas, esquís, paus e casco). Despois fomos a estación para a nosa primeira clase, pero antes houbo que poñerse as botas de esquí e iso era o máis doloroso, moito peor que as caídas. Cuña para aqui, cuña para alá, acabamos o día mallados.

O martes continuamos coa cuña e a subida en escaleira. Cando practicabamos libremente despois do marabilloso bocata de tódolos días, vai Borre e cae, convertíndose no primeiro lisiado. O pobre quedou sen poder esquiar máis, castigado toda a tarde comigo mentres os demais visitaban o torreón e o museo de Puebla de Lillo, e paseando en muletas a partir de entón.

O mércores seguimos co esquí e, tras engullir o bocata, dereitiños a ducharnos para marchar a León. Tras facer a "cucaracha" e visitar a catedral (moi ben explicada por Max e Xaquín), dúas horas de tempo libre para todos.

O xoves xa case todos xirabamos e eu, coa axuda de Xan e Xosé Luis, alá me fun pola pista azul de Requejines abaixo, caendo cada dous por tres. Pola noite houbo actuación estelar dos diferentes grupos de Pontevedra, Meis, Mosteiro e Cambados, pero a actuación estelar celebrouse no garaxe, onde os nosos monstruíños fixeron unha gran actuación.

E o venres todo rematou. Todos os que quixeron tiráronse Requejines abaixo cos monitores. Cando parecía que Borre sería a nosa única baixa, uníronse Carmela e Laura. Repartiron diplomas e batidos de fresa para todos. Despois de devolver o material, uns engulimos o bocata mentres outros se cambiaban. Con todo ese aroma a humanidade, marchamos para Cangas, parando novamente na Gudiña e deixando a Yoli en Porriño. E para que houbese anécdota final, tiveron que vir os pais da estación ao concello porque a semana santa xa comezara en Cangas.

Aquí van as mellores fotos da semana:

E algunhas máis das paisaxes:

E xa sabedes, todo o que se me esqueceu contar para os comentarios... ou quizais unha entrada (versión alumnos).

EEUU en 3minutos

http://www.youtube.com/watch?v=RJLglKyYumc

Xa estamos na Wikipedia

Como ben sabedes a Wikipedia/Galipedia é unha Enciclopedia libre, en liña, políglota, colaborativa e interactiva (unha wiki), creada no 2001 e feita a partires das aportacións e artigos de milleiros de usuarios de todo o mundo sobre diversos temas, respectando sempre a súa normativa e a política de edición e contido dos artigos (sen publicidade e con obxectividade).

Coa colaboración dos alumnos/as Moisés Pérez, María Donaire e José A. Pérez de 1º A, Jessica Alfonso e Sara González de 1º B, Ángel Iglesias e Jessica Pazó de 2º A, e Santiago Hermelo e Gonzalo Míguez de 2º B, preparamos unha sinxela entrada sobre o noso Centro (IES Monte Carrasco) para facer uso das novas tecnoloxías e familiarizarnos coas posibilidades didácticas da Wiki e aportar unha información da que carecía a Enciclopedia (non estabamos na Wikipedia !) e que pode ser editada por calquera usuario rexistrado que, repectando as normas que comentamos, queira ampliar ou actualizar a información.

Para os interesados no uso das wiki como ferramentas educativas podedes consultar neste enlace, entre outros moitos. Animádevos a consultar e participar. 

Agradecemos a Xabier Cid, administrador da Galipedia, os consellos e a axuda que nos prestou para  elaborar a entrada na wiki. Un saúdo.

Entroido

O venres pasado celebramos o entroido no Carrasco. Mandoulle, non? A cousa estivo moi ben. A xente animouse, as murgas foron de alto nivel e atacaron os puntos febles.

A xente disfrazouse do máis variopinto, pero mandaran as tribus urbánas.

A xente pasouno ben, as da ANPA alimentáronnos ben e a festa non parou ata que soou o timbre.

Saída a Santiago

Que bo é o profe Xaquín que nos levou de excursión a Santiago aos de 2º e 4º da ESO e a Miguel e Álex.

Estivo ben a visita á catedral, ás fermosas rúas de Santiago, ao Museo do Pobo Galego, gracias ás historias que nos contaba Xaquín. Só un pequeno problema... a choiva. Pero como a choiva en Santiago é arte, vimos unha gran obra de arte ese día (e ata a sentimos en nós mesmos).

Claro que haberá quen diga que o mellor foi ir a Área Central, pero sobre gustos non hai nada escrito.

Xornadas deportivas no María Soliño

Aquí chega (máis vale tarde que nunca) a crónica das xornadas deportivas no IES María Soliño. Xa ninguén se acordaría do que pasou aló a finais da primeira avaliación de non ser porque gañamos a case todo (o case por mor da rapaza esa que o segundo día non soltaba o balón de ningún xeito).

En fin, as nosas mozas e mozos deixaron o pabillón moi alto en todos os deportes. Cando chegou a proba cultural, máis do mesmo. Por un axustado medio punto o primeiro día e con máis vantaxe o segundo, os nosos cerebriños amosaron que teñen algo máis ca paxaros na cabeza.

O primeiro día tocoulles aos de 1º e 2º.

O segundo día foron os de 3º e 4º.

Imaxes interactivas: agregar a favoritos.

Os compañeiros Xosé Antón Vicente, Felo Couto e Fran Macías veñen de obter, na convocatoria de premios a recursos educativos para a sociedade da información, o primeiro posto coa ferramenta de autor "Imaxes interactivas", que facilita a creación de imaxes coa posibilidade de seren enriquecidas con todo tipo de elementos multimedia (sons, texto, imaxes...), de manexo intuitivo e sinxelo e de grande plasticidade para o uso en tódalas áreas de aprendizaxe e co encerado dixital interactivo.

Estes son algúns exemplos citados polos autores e, estes outros que seguen, moito máis sinxelos pero indicativos do seu potencial, fixémolos coa colaboración dos alumnos e alumnas Sara González de 1º B, Moisés Pérez de 1º A, Jessica Pazó de 2ºA e Gonzalo Míguez de 2º B:

• A casa e o seu entorno

• Partes da oración

• O noso IES

Parabéns aos premiados pola súa contribución á metodoloxía posibilitadora da utilización das Tics no proceso de ensinanza-aprendizaxe e o meu agradecemento persoal a Xosé Antón pola súa paciencia e axuda prestada para iniciarnos nesta ferramenta e poder poñela a disposición da formación da nosa diversidade educativa.

Diversidade: o normal é que sexamos diferentes

A atención á Diversidade é un tema que nos preocupa ós docentes e suscita tantos posicionamentos diferentes, diversos, como maneiras temos de entender os conceptos de ensinar e aprender. A actual lexislación educativa establece que a educación obrigatoria organízase de acordo cos principios de educación común e de atención á diversidade do alumnado. Esta atención a diversidade deberá rexerse polos principios de normalización e inclusión escolar e social, igualdade de oportunidades e non discriminación.. Concíbese, xa que logo, a atención á diversidade como o conxunto de medidas e accións deseñadas coa finalidade de adecuar a resposta educativa ás diferentes características, capacidades, ritmos e estilos de aprendizaxe, motivacións e intereses, situacións sociais e culturais de todo o alumnado.

Entendo que se todo o alumnado precisa da atención á súa diversidade, máis aínda aquel que polas súas características, derivadas de discapacidade ou trastornos de conduta, altas capacidades e/ou incorporación tardía ao noso sistema educativo, require de determinados apoios e atencións educativas específicas. Pero de ningún modo se entende que eles son, en exclusiva, a diversidade referida, como parece deducirse de algún contexto administrativo, editorial ou de centro.

Considero que a diversidade é inherente á escola obrigatoria e o punto de partida da acción educativa. A atención que a escola lle preste constitúe o seu mellor indicador de calidade, sendo unha obriga do conxunto de profesoras e profesores do centro, a súa implicación e resposta de acordo coas medidas, criterios, fórmulas de participación, coordinación, avaliación e transferencia de experiencias recollidos no proxecto educativo do centro.

A evolución dos tempos e da sociedade achega ás nosas aulas rapaces cun alto grao de heteroxeneidade que dificulta o desenvolvemento dun proceso de ensinanza e aprendizaxe común capaz de dar axeitada resposta ás súas necesidades de formación. As situacións persoais, sociais e familiares condicionan en maior ou menor media, o rendemento e aproveitamento escolares, razón pola que o noso Centro puxo en marcha unha ampla serie de medidas de atención para tentar paliar e compensar estas desigualdades axustando a nosa intervención ás súas necesidades.

A atención que dende a aula de apoio e recursos educativos lle estamos a dar á diversidade con necesidade específica de apoios educativos baséase, en grande medida, nunha metodoloxía de traballo centrada nas novas tecnoloxías, por aumentar as posibilidades didácticas e acadar maior participación nun ensino máis personalizado e colaborativo. Conscientes das vantaxes que para o traballo con este alumnado supoñen estas tecnoloxías, vimos recollendo e utilizando dende hai algún tempo unha serie de ferramentas de autor e recursos web que nos permiten aprender facendo e que damos a coñecer por si foran de utilidade para o desenvolvemento doutras medidas.


* Recursos para diversidade educativa
* Actividades e Recursos educativos
* Wiki de recursos educativos
* Compendio de recursos web 2.0

Creo que calquera tempo educativo pasado foi peor e que, apesares de que a meirande parte dos problemas escolares que vivimos nas aulas son alleos á escola, non podemos fracasar na tarefa de limar as desigualdades de partida e espertar en cada un dos nosos rapaces e rapazas as súas mellores facultades. O reto consiste en ser quen de ofertar a cada un a axuda que precisa, axustando a intervención educativa á individualidade e definindo a función e coordinación de tódolos profesionais necesarios para acadar unha resposta educativa de calidade ás necesidades de formación; é unha responsabilidade non só profesional, senón ética.

Oxalá que o novo Decreto polo que se regula a atención á Diversidade do noso alumnado sexa quen de levar a práctica esta teoría e nos dote dos recursos, formación e asesoramento necesarios para elo, sen que os criterios de rentabilidade económica primen sobre os pedagóxicos e de xustiza social.

Enlaces de interese:

Borrador Decreto Atención á Diversidade

Hacia una escuela inclusiva

Nace "o faladoiro"

Estamos de noraboa no Carrasco. Xa naceu o club de lectura "O faladoiro" e, xunto con el, o blog homónimo para o club e a biblioteca do Carrasco. Pasádevos por...

ofaladoiro.wordpress.com

Sarabia no Carrasco

Ola!

O martes 20 de xaneiro produciuse un deses fenómenos meteorolóxicos que sorprenden e impresionan, polo menos aquí na costa. A primeira hora da mañá, caeu unha sarabiada tal que deixou cuberto todo o Monte Carrasco. Estaba tan branca a cousa que a xente preguntaba dende as fiestras "É xeo ou neve?". Non era neve, pero deixounos unhas fermosas fotografías.

Caderno de Bitácora: IES María Soliño

Capítulo 4:

Boas a todos e a todas, que como nos dixo a profe de lingua, e obrigatorio dicilo, xD

Xa facía un tempo que non había Caderno de Bitácora non?

Pois hoxe volveu nun novo ano, si no 2009.

Hoxe non vou facer un repaso da actualidade no Soliño, senón máis ben

o que me gustaría sería preguntarvos a todos os que vos pasarádes que foi

para vos o ano 2008 como alumnos do IES Monte Carrasco.

Para min foi a despedida dos mellores profesores e compañeiros que encontrei

polo de agora. Foi o ano no que finalicei a ESO ó fin, aínda que comecei co Bacharelato :S

Nese ano fixemos o viaxe de Fin de Curso, a Barna :D :D :D :D :D :D :D !!

En definitiva, e quitando as clases e os examnes, foi un gran ano ;)

Agora tócavos a vós alumnado do Carrasco (e que se digo alumnado non teño que decir

alumnado e alumanada?, xD )

Ata aquí este Caderno de Bitácora, todo isto e moito máis na próxima edición, que sabe dios

cando será :D

Saúdos!!!

Bo nadal

Desexámosvos bo nadal a todos coa postal e os cantos de reis dos nosos alumnos:



SOMOS OS REISES DO KIRIKI:

Cantámosche os reises guedellos de cabra
Cantámosche os reises non nos deches nada

Somos os reises do Kiririki
Vamos a ver que nos botan aquí
Somos os reises do cacaracá
Vamos a ver que nos botan alá

Somos os reises da cabra fanada
Viñemos eiqui non nos deron nada

Aquí vimos catro, cantaremos oito
Danos de aguinaldo, fuciño de cocho
Ao aguinaldo, ao aguinaldo andamos
se nos dan fuciño tamé o levamos

Recollida por Jessica Alfonso Gandón



NO PENDELLO:

No pendello que hai xunto ao camiño
Hoxe ás doce da noite nasceu un meniño pequeniño
Que parece que do ceo caeu
Un meniño pequeniño
Que parece que do ceo caeu

Entre o bafo de dous animais
Pois o pobre cubertas non ten
Nin señales de pañales para tapalo do frío se ven
Nin señales de pañales para tapalo do frío

Levareille logo este mantelo
Anque as frebas boa fallan me fan
E un roxelo de bo pelo.
Pra que faga bos caldos súa nai e un raxelo de bo pelo
Pra que faga bos caldos.

Levareille tamén esta pita
Pois co neno máis guapo que eu vin
E a cabrita máis bonita que pra el do cortello escollín
E a cabrita máis bonita que pra el do cortello escollín

Recollida por Leticia Valente e Uxía Molanes


OS PEIXES BEBEN NO RÍO

A Virxe se está peiteando entre cortina e cortina
Os seus cabelos son de ouro e tamén de prata fina

Pero mira como beben os peixes nese río
Pero mira como beben por ver a Deus nacido
Beben e beben e volven a beber
Os peixes nese río por ver a Deus nacer

Recollido por Sara González



Mirai, mirai que feitiña
a cuna do neno Dios
Quén fóra algunhas palliñas
para quentarlle o corpo ao señor!
Quén fóra algunhas palliñas
para quentarlle o corpo ao señor!

Pastores cántanlle ao neno
porque os ánxeles fuxiron
Quén fora como eles
adorarlle a aquel meniño!
Quén fora como eles
adorarlle a aquel meniño!

La, la, la, la, la, la, la, la, la

Recollida por Xesús Bermúdez Rodas

Recursos e actividades educativas

Preséntovos unha nova recompilación de recursos e actividades educativas que poden ser de interese para os vosos traballos e estudos.

Uploaded on authorSTREAM by jvidal

25 de Novembro: Día Internacional Para a Eliminación da Violencia de Xénero

Hoxe conmemoramos no noso centro o Día Internaciónal Para a Eliminación da Violencia de Xénero. Concentrámonos despois do recreo na porta principal para amosar a nosa repulsa contra a violencia de xénero e o noso apoio a todas as mulleres e familias que a padecen.